القطة والبالونتين والايريال وحاجات تانيه

القطه على السطح اللى قصادى بتلعب ف الكراكيب
وبتتشقلب
وتنط تمسك ف الايريال
والايريال واقف شامخ وعبيط
...
عدت خيمه مقفوله تماما م الشارع
اللى عامل زى صباع السجق
ف الشارع صندوق
وف رف الصندوق الرابع بالونتين
منفوخين ع الآخر عمالين يلفو
حوالين بعض
وفيه حته زقزيقه صغيره بتتنطط
وتضحك وترقص وتلط انتفاخاتهم
فتحسسنى انى اقدرأقف ف البلاكونه
وابص على الشارع بصه
مجرم بينتهز
الفرصه
عشان يرتكب آخر جريمة قتل
- مش لأنه ناوى يتوب لا سمح الله
لكن يمكن عشان بيتهيأله ان المنفوخ ع الآخر
لو طق هيتحول لزقازيق صغيره ترقص
وتضحك وتتنطط وما تشوفش الرف .
******************************

فى الحته الفاضيه ع الشماعه

معقول .
الحسابات مظبوطه على غيابك
بس اتحرك
وسيب الحاجات القديمة ف أماكنها , بتقلها
وخفتها
.....
يادوبك
هتركن الشنطه
وترمى جسمك ع السرير
!لا والهدوم بعفارها وعرقها هتتبت
ف الحته الفاضيه ع الشماعه
وتسيبك
لصعاليكك وأنبيتك وفرسانك وفتواتك
تاكلو سوا وتلعبوا سوا وتضحكو على بعض
وتضربو بعض
وف التلاتين
هتهرب من موتهم
وتدور على أفضى حته جواك تدفنهم فيها
أكيد فيه حاجه تانيه
غير مجرد سفر قصير ملغومه بالخوف
م الوصول للشماعه اللى ف ضهر الباب .
**************************