صلاة الشمس ( أكتوبر 1984 )

النيل والناس والناى
موال عراجينه تسقط حين الليل مايخش
خيول ما استأذنوش فرسان الصبح ابو وش حديد

زغاريط وسريخ
حدوته قديمه بنص العين من صدر الأرض تبص :
كتاكيت بتنقر قشرة بسمه نخله عجوزه
مدهونه بطعم البهتان

وبزاز وفخاد \ صهاريج
مليانه بضحك عيون الشهوه
وايدين تتمد تطاهر عيل
تخصيه

عصافير
من ننى عيون فوانيس باهتين .. بتفر
تتوضا بلبن الموال
وتصلى ف صدرى صلاة الشمس :

آتون .. آتون
من وقتن كنت لزمن الطرح .. عيون
لم حاضت نخله بشط الناس \ الطين
لم رفعت شجره ف وش الصبح .. عيون
أوعى تكون
دحرجت هواك لبعيد
أوعى يكون

  مشوار العمر طفاك .

                              ( أكتوبر 1984 )

عالم جوانى .. برانى ( أكتوبر 1984 )

لو كان غنايا يالأحبه .. طير
لافرد مابين الشمس والحزن المباح .. موال
وافتح شبابيك ياصدرى ع الفضا الواسع
.. وارن زغروطه
تخرج بوسع الحزن ف الصدر - البراح
تضحك ف وش النخل
وف وش بحر النيل

م الطمى تتشكل عيال
واغنى فيهم باتساع صوتى
رقصه غريبه نبتدى فيها
الرقم يمكن شاذ
الشمس ف ايديا
أما القمر ماعدنا نحتاجه

الصبح ويا الليل .. بيدحرجوا لنا السلام
وبيدخلوا فى الرقص ويانا

نز العرق منا
عبينا كاستنا
الصبح هزه الضحك ف عنينا
سقط علينا الغنا

هامش
الليل بيعدل ف الربابه
مستنى دوره الجاى .

                            ( أكتوبر 1984 )

ثلاث قصايد ( اغسطس 1984 ) مهداه الى عبد الرحيم منصور

قصيده 1
مدخل
       هل الحزن يعنى انفجار الغنا ؟!
       هل الورده تشبه لقلب الحوارى ؟!

1
كفوفك بتنضح عجينه تحول ..
وشمس النهاردا ..
يدوبك تقرص خدود العيال
تفتح فى صدر العراقا .. طاقات انتظار
وانت بترسم لقلبك شفايف
وتضحك فى عبى
فتخلع فراشه كسوف الشرايين
وتخرج وترقص معايا على حصو شط الغناوى
تفاجأنا ايد العماير
فنجرى ونلعب فى صدرك عروسه وعريس

2
عبيه العماير
بتلبس جاوند امريكانى
وتتمد ناحيه ضفاير بريئه

3
شريطه الضفيره الشمال
فى وسط العماير شايفها حزام
ولسه دموعك بتبنى فى هرم
ولسه وشوش الحوارى كاسيها التعب ؟!
فقوللى : البلاء \ الحوارى \ النايات \ الشطوط
والا البلاء \ البارات ؟

قصيدة 2
زمان مصلوب
جبان بيضسن
قمر \ عصفور جريح
نجوم \ غربان
تلقط من عيون صاحبى الغنا
وتتبول فى جرحه

قصيده 3
قمر دبلان
وشقيته الى نصين
على صدى اصيطغيت نصه الشمالى وشم
ونصه التانى علقته ف ضفيره
 لسه متفكتش .

                          ( اغسطس 1984 )

العرق ( يوليو 1984 )

1
آه
مخنوق بدخانك ياعين
يارخيه فوق الآهه جفن برمش صبر ورمش خوف

نقرت بايدين من دفا
فوق صدر كان طمييى
دقيت
دبدبت
هل ينكسر فوق البيبان
صوت الشعاع \ العرق ؟

حملت قلبى نبوءة الريح الجديد .. ودخلت
ماقتش فى البيت الكبير
غير دمعتين عواجيز ..
وضفيره لم يكمل

دحرجت فى الصاله \ البراح .. صوتى
ورميت على الضحك القديم .. سلامات
خرجت طيور حزنانه واتجهت لدمى :

2
الشمس لك
الشمس لك
مين اللى واقف ع الحدود
العسكرى والا الملل ؟!
الغنوه تفقس م العرق
والضحكه ف العين البريئه
زهرت .. مشتاقه لك
الشمس لك
الشمس لك

الوهم شجره فرعت
ما أجمل الطير الجديد .. لحظه مايحلم بالغنا .. أخضر
ما- يالضفيره .. اجملك
لحظة يصير الحلم بيكى زقزقه .

3
الحزن لك
الحزن لك .

                               ( يوليو 1984 )

وردة رباط ( نشرت بمجلة جذور يناير 1985 )

ياطالع النخله
لسه الولد رامخ
لا تحدد الدخله
سهم المدن شامخ

1-

باخرج بشرخى ع الوشوش اللى مبوشها العرق
ناضجه السكك بيادات
وردة رباط بتضيق على رقبتى

أغنيه
نقر ندى زندك
على ضرفه الشباك
مين فى الزمن مدك
مين ع الصحارى رماك

كورس
فاتحت وشك ابتسم .. فضحكت انا
نتورت حب الضى فى ارحام النسا
خرج الودع م الرمل
بحلق فى شايى .. فاندلق
" قلبت شايك
                 الشرخ جوايا مفتت بسمتى أهرام "

2-
مالى الصفار القرب
لا طمى من مسام الوش
داقين مسامير المسافه عكس صوت الطلق

3-
تخرج ايدين بالصدا
وتهز قنديلى
تسقط بلاد الشوك فى بقعتين من صمت
من فوق ياتات الشجر
هز السؤال مايسقط الحنه
زمنك يابزبوز السفر
بيشر فى صدرى
يخرج غنايا جدور النخل
" الوقت ده طوبه
والرحله معطوبه
راح ينولد أمشير
برقع صدورنا يطير "

غنوه
بيشب النخل يطول الليل
ويقطف زهره المتطفى
لكن ودى آخر نظره رماها النيل
وهيخبج بينكم متخفى "

1-
جسمين كما فطيرة عرق
فاضحه فخادهم فوق كفوف الشوك عيال
بيغمسو الليل بالقلق
- طول مالحوارى كتاب
تبقى القرايه حرام
قلبى قرا .. وانطلق
فر الحرس فرس الشعور
اتلم فى جرح الوطن .. واتكوم
2-
وشى يسع النخل متشرب
من خرم باب مقفول
كانت طيور العتمه بتنقر نجوم العيون
تطفيها
يسقط على ملاية السرير .. نص الوطن
3-
الفجر طالع طير صغير
لسه ريشه مكتملش
نبله فى أيد الحرس
بتحط رقبتها
ترمش عيون الفجر
وتدارى دمعتها

وانا وحدى فى الجرح اللى بيزيد اتساع
بابكى المسافر ع البلاد .. النخل .

                                                  ( يوبيه 1984 )

الشرخ ( ابريل 1984 )

لسه دموعك فوق خدودى نار
وانت على جسر القصيده
                     مين رماك ؟

1
بين الحدود والقلب
ممدود أنا وترك
فرفطتى حبل الحلم للفاس الحديد
وبتخرجى من بين دراعات العماير للرصيف
عريانه فى طمييى
ترمى عنيكى سل
يندب فى لحم القصيده .. انزفك
واضحك فى حين النزف مايوشم على صدرى
صورة صبيه مغمضه عينها
تتكفن الضحكه فى طرقعة البكارة والقواشيط والبخور
تخرج عنيا من بيرين الملح
وتتدألج تتوه فى الرمل
ماتبقى غير دمعايه تتنطط على كتفك
وحين توصل ضفيرتينك بتبقى شال
أصفر بلون الجرح
أخضر كما جسم النحاس فى الطل
وترد تحفر فوق خدودى شرخ

- ياسكه دايما بتبتدى من دايرتين
فرعتى ورقك فى الخريف
ولدلت ياما فى البيا صوتى
ماخرجت يايوسف
طرطش ندايا فى الحوارى عديد

عدوده
شميلته طلت م الصندوق     ياتلبسونى ياتنزلونى السوق

2
أغنيه
أبوح يا أبوح
ياننى عين مجروح
أن عطر عرقك فاح
وتد الهوا ينحل
شوك الأحبه فل
زهر البنفسج روح

كورس
كل الأيدين الدبلانين ماده رقابها للمطر
متصلبه العيون جهه المواعيد اللى خاصيها الجدار
القمح هيسنبل .. فى طاسه الخضه

3
حنيت كفوفى جنون
وفتحت صدرى فى زمان أمشير
عبى يساع دمعك

4
لا تصلبينى فوق جدار مدهب
لا تخبى نبضى فى قزاز الوش
قيسى المسافه بين دموع الرمل والصبار

5
- منديلى اهوه فرشاه
قوم بينا نتغدى

- عدى النهر  عدى
كلتى سل لمون  أن جسمك الملحى زربوه بيا
هارمى سلامى ع الجريد وانداح

                                                                ( ابريل 1984 )

السفر فى الغربال ( فبراير 1984 )

لما قالو ده ولد
اتشد ضهرى واتسند

حين يبتدى الغليان يبارك طرح اشجار الصدور
بلقى سنوحى يحترف لعب التناسخ والماهنه ع الشراب
يدخلنى صوت ملهوش ملامح ويشاركنى فى حبال الحنجره
تشعر حروفى بالشتا
ويدمع النخل المعافر م السباط رامخ وصيص
وتدوب وسايل الأتصال
ألقانى من بعد التجمد وش باهت فى كراريس العيال
ع السكه اتسسب من القرص الغريب
دم انتحار
واتمد فوق عين الشبابيك النهار
أرخى ستارات الرموش الليل

أغنيه
لميت أنا دمك
ياريته كان يروى
دى ريحتى فى كمك
حين المسا تضوى

كورس
صفح القلوب ما تنقريش الا بقلوب
والشرخ كل الصبر مايكتر .. يزيد
كل الخطاوى ع السكك راسمه ( يزيد )
أما ( الحسين ) فرياحه بتخاف الهبوب

- اللوحه مرسومه وينقصها الرتوش
- الجسر بينا عمره يوم ماراح يبوش

2
كانت نجومنا  صاحيه فوق زند الرجال متلألأه
أما النهارده ما عاد بيضوى الا حبات العرق
فوق الفخاد

أغنيه
كتبو كتابك يانقاوه عينى
على صيط أبوكى ريس البرين
كتبو كتابك وقبضو مهرك
على صيط أبوكى والا صيط أهلك ؟
على صيط أبوكى ريس البرين

- زاولو على ريحه البخور .. ي هل العروسه حكمكم
الشمس مش هتطل من بين الزغب
الا ويزهر قطنكم فوق الرمال

- يامنفرد فوق الوشوش
كل الجدور المتعافيه عمرها ماتنحنى لما يبايعها العفن
بزياده زن
كل الودان ضاحكه عل نكتك مجامله مش رضا
دبور وبتمنى الخليه بالعسل
الوعد من أول ميعاد للبل باش
ياتل شاش
عمرك ماتقدر تربط القلب الجريح
 
                              حلقاتك
                              برجلاتك
                              حلقاتك
                             برجلاتك

                                            ( فبراير 1984 )

ترنيمه وتر جريح ( يناير 1984 )

1
يالحضن يابرج الحمام
كانت حمامه تمتلك من رحله العمر الزغب
وحكمت يومها تغترب
- الشمس كانت وقتها شاربه ضلامات المغيب-
طارت ولحظه مانتهى عمر الجناح
حطت على الوتر الغريب
رحله خطاوى شدها تيار حضارات الدمار
من قبل مايطلع على المادنه النهار
فتحت شبابيكها على عالم خراب
الشرع عنده ان مدافع ينطلق منها الحمام
والأرض لو مبدوره ببذور القنابل والبارود
تطرح أكيد
أغصان تبوس خد التراب
كانت الحمامه وقتها يادوبها طفله فى المجال
لسه بتتهجى الحروف
مارسوا معاها شرعهم
بدروا أراضيها رصاص
حبلت بأشجار الجماجم والجتت
واستنت الطفله البريئه ينحصد زرع الرصاص
( جلها النهار )
قام صابه فى الننى عيار
نزفت خيوط الشمس
تطريحه سواد
حطت على وتر التمنى كام سحابه
من طيور كان عشها برج الدانات
باض نتيها ويا الدكور
مليون شؤال
جوه عيون بتردد الحكمه القديمه
" الصمت ابلغ م الكلام "
كانت محاولات الأجابه وقتها أكبر حرام
أما الحلال
أبكى على اللى ينجرح أو ينقتل
واقرا فى سرك
كل آيات السكات

2
سافر مع الصبح الجريح زمن الهديل
صوت الأمانى انتحب
همهم برمهات الأسى
- ( يابكره هلى ممكن تفوت
من بين خيوط العنكبوت
تنزل تهز حبال حناجرهم
تسقط من عليها كل كتلات الصدا )

- عداش عليكو فوق براقه مصطفى ؟
من قبله هل عدى يسوع
يالجبانات العايشه فى بلاد الضلوع
ضى القمر جوه عيون الخلق هلى صح انطفا ؟

3
عدى على جسم الجريحه ألف بكره
والقمر لسه على وشه الجريمه مسطره
البيض فقس
فى جروحها فى صحاف الجماجم .. فى الخراب
نعقت على أوتار صدور الحلم أفراخ الدمار
واخواتها بيطاطو فى روسهم
يحلفو أنه المصير
ورق النتائج يومها أعلن ثورته
قام شق جدران العناكب
وانتصب يخطب على راس الميدان

فرت جموع الحشد من صوت الخطب
وبسرعه دارت روسها فى زمان الجحور
قالت :
سوى طلع النهار
أو دارى عنا سحنته
قالت :
سوى دار القمر أو لم يدور
هنعيش لحين الورقه ما تسقط
فليه نجرى نعجل عمرها ؟

4
الليل لحد اللحظه مازال المدار
كل القرايب دايره فى نفس الفلك
من نقطه واحده ينطلق كل ويرسم فى الفضا
كام ألف دايره مفرغه
يرسم فى كراس الحضانه وش باهت للنهار
يرسم رموز متطلسمه
يفتح كتب
يقفل كتب
ويناقش التسعيره فى اسواق الخضار

- صوت ختامى اضطرارى
الوقت لك
يامن تفكر أن تغادر  ذا المدار .

                                        ( يناير 1984 )

من وحى الذكرى والتذكر (أكتوبر 1983 )

على أنقسام قيثار الجهل
رقصتى ياخمر فى كاس العشيره سنين
دبح جدى على هزات بنات البغى أولاده
حبابى عنيه
بخور كاهن .. وترتيلات
بيملو جو دنيتنا
وكان صوتنا بيطلق فى المكان غنوه
بكام نغمه نشاذيه
عشان يرضى الآله عنا
مع انه ( لاكان ياكل ولايشرب )
ولا يهجم ولا يدافع
ولا حتى يهش بايده دبانه على وشه
بترمى السخط واللعنه على جسمه
وتلعن جهلنا الأعمى
فى حين نسجد لشىء مصنوع
وكانت حكمه تنطقها:
- وكيف مصنوع بايد مخلوق .. يكون خالق
ده انا مخلوقه م الخالق
فانا أولى بعبادتكم)

وليده من بنى أمى
بتصرخ تحت كيمان الرمال .. الموت
بتستعجل ايديك تيجى وتنجدها
تلم اخوتها م البارات
وم السكه اللى مش مضمون عواقبها
مصيرهم ايه اذا ماجتشى فى ميعادك ؟

صوت خارجى
ولد الهدى فالكائنات ضياء
                          وفم الزمان تبسم وسناء

مابين القاعده والمسنع
وبين ضلعاتى .. فى الصاله البراح خالص
رايتك نور فى بيت احساسى متربع
سمعتك صوت بيفتح سكه ف الممنوع

صوت داخلى
وهل ممكن فى عز النور أبو الحكمه
يقومو الجهل والضلمه
يمصو من عيون بكره
ثوانى الشوف ؟

وهل ممكن اذا جهلت عقولنا
حل الفزوره
نقوم نقرا كتاب الخوف ؟

جعان والقمح فى الجرن اللى بينى وبينه كام خطوه
وليه يرفض جيران الحى ؟

صوت أخير
مادام بترضعو البذره سمش الخوف
مادام لسه غيلان الجوع
بتنهش بطن أولادنا
مادام لسه بنسمع غنوه تردد
حوالين الحجر والمال
مفيش غير اننا نتلم
ونولع ف وسط اللمه شمعايه
على ضوءها الخفيت نقرا
كلام الله

                                           ( أكتوبر 1983 )

تجاعيد مهداه للصديق اسامه شهاب

1-
فوق العبايه الحبلانه بعنقود الشمس
شفتك واقف
بتلقط من زمن التغريب الشايب
تجاعيد الوش
وبتفرد على كل حوارى الحزن المطفيه
جناحات الصبح
فوق راس الولاده بترش الملح
وبتضم خلاص الفجر فى حضنك
تبتسم
يتعدل حرفى الماسل حين يلمح سنك
يصلب طوله ويلملم حرفين م الصدر
ويجمع كلمه
" مش ممكن تتفتح زهره
ان غاب الجسد
مس ممكن راح ينبض قلب
ان فات الصدر

2-
متكحل سقف الأوضه البحرية
بدموع القمح المجروح القلب
متحنيه البنت البكريه
بدم الزغاليل اللى بيعشقها رصاص متعاجب
- مع ان الزغاليل لساها صغيره السن-
( كانت الطلقه بتخرج ريقها بيجرى
وبتلعب بالعين والحاجب )

ضل الوناسه ساعتها شفته بيطول
كيف رقبات الاحرار
- مع ان العتمه .. مكانتشى حبله بنهار-
فوق الحيطه الواقع منها اللطس
شفت الضى بيرسم وش
مش متحدد ليه أبعاد
يتلفلف خط الضى وبيرسم دايره
حوالين الوش بتضيق
حين جاز الوناسه يقل

3-
حين قرص الشمس مكان متعفر برياح الليل
اتجمد دمع اللبلابه المخنوقه
واترش التغريب ع الطير
طاطت من شده ريح العتمه جذوع الدوم

عدوده
عدد فى الغيط الفاس
سلامى عليك يانخل وادينا      وان قسمت الجيه تلاقينا
سلامى عليك ياساقيه الدلتا    وان قسمت الجيه تبقى دخلتنا


4-
يدخل وشك مبتسم
م الطاقات المفتوحه فى جسمى
يزرع كل خلايا الجسم تمرد
يدخلنى الأحساس بالطرح
ألملم كل حوارى الولاده فى صدرى
وأضم عليهم جناحات القلب
تاخد كل السكك المجروحه شهيق

تتمد ايدين
وتسد الطاقات \ النور
يخرج وشك
ومايخرجشى من صدرى زفير .

                                                   ( مارس 1984 )

ترنيمة حرف ضال , مهداه الى بيرم التونسى ( يناير 1984 )

مدخل
وقال اسحب خيوط الفجر..
من جوف الضلام ياحرف ..
وقال لازم كتاب الحاره والعطفه ..
يقرر فى مناهجنا كما الاهرام
وقال الشرخ فى المرايات وداخلنا
وفى الجسر اللى بين الحس والتعبير
غويط خالص
ولكن كل عقده وليها فى راس الصراحه حل
اذا لقطنا أحلامنا
بكام منقار م الاقرار
بان الشارع لغرقان فى دم الحاره والعطفه
منقدرش على اسفلته نقيم جامع
......
.....
كان القمر أعمى
داير بيشحت من بيوت الشمع تصبيره وجود
لما البيوت الكهربا مرضتش انه يبقى حى
وحرج له م الشمعه اليتيمه
رغيف ومتغمس بضى
كانت حوارينا ساعتها بصه للشارع بخوف
أما البيوت متشقلبه .. متشعلقه .. أشباح
غرقانه فى الليل السود
والناس يتتكلم سكات
حبلانه بالقوت والعيال
والنوم فى احضان النهار
هوه نهايه المشكله

نزلت دموعه تجرى فوق خد الطريق
وشمت زوايا فى جوف مثلث ناقصه ضلع
كسرت جسور للنيل يسافر فى الاراضى العطشانين
فتحت طريق للنيل يسافر فى الشرايين اللى فيها الدم
اصبح تلج خالص
صنعت لسان للحرف لخرص
أو حرف ناطق للسان اللى انخرص
كبرت حروفه فى السطور
طرحت دموعه فى الغيطان الشقيانين
وفى الحوارى وفى الازقه
مليون قصيده بحس أولاد البلد

الفجر لسه خيوطه فى جوف الضلام
والحرف مخنوق فى القلم
والليل مازال
صوره بطاقه للزمن
ممضيه بال..
" نزلت على وش القزاز
كل الستاير يابشرأصفر يالون حمل الورق
فوق الشجر
فصل الخريف هوه اللى فاضل
م الفصول
أما التنفس بالرئات
أصبح خطر "

                                             ( يناير 1984 )

تذاكر سفر ( ديسمبر 1983 )

واتسرسب الحلم الصغير
من عب أبويا ع الطريق
حبات سفر
- مكتوب عليكم الاغتراب
يللا ارحلوا
حين ثوره الحوجه على الرمل المسالم .. ارحلوا
حين سوط غنى ينهد بيه حيل العزايم ..    ارحلوا
حين بيع جلودنا فى سوق حضاره ..       ارحلوا
حين شرب بكره بكاس مراره ..            ارحلوا
يللا ارحلوا
مكتوب عليكم الاغتراب
قاموا فزوا مجموعه صحاب
" والذنب أيه ؟
والحكم ليه النفى ؟ طيب اسمعوا ؟
لكنه ماحدش سمع
بلعت حيتان الصمت فى بحار التجاهل
كل الاصوات الولاد
والامنيات .. يابويا ليه
حباتها لما تتلضم ماتبقى عقد ؟
شايفها موت ؟
مر حل حبال المشنقه فوق الرقاب
تتدلدل الروس الى كانت أعلى من أعلى هرم
وتطاطى يكبت دمها فوق التراب
" مكتوب عليكم الاغتراب "

يابويا يللى
كنت حين الضلمه ماتفرد خيامها ع الطريق
بتلمنا تحت العبايه كلنا
وتمد ايدك جوه عبك
تخرج ايديك شايله الخزين لسنين عجاف
وتفرق المخزون
- خد انت نجمه
وانت خدلك نجمتين
اما انت ومراتك وطابور العيال
خدلك قمر

يابويا ليه
عبك ماعدش فيه النهاردا غير تذاكر للسفر ؟

العتمه يابا رخ اكبر م الكلام
واحنا يدوبك تحت منه بيض عقيم
باضتنا أيام التمنى لجل نفقس طفل حلم
لكننا صابنا العقم
لكنها ماتت دموع
واتجمدت فى جوف عيون الكون قمر
مخنوق فى بحرك ياسما
وانا والولاد والصحبه ورفاق الطريق
لسانا بنسقف بغطيان الحلل
لسانا بنطبل على العلب الصفيح
بنغنى للحلم اللى مات يوم متولد
نتمنى ترجع ياقمر

والجهل يابا  ...   اللى ألف ده النشيد
والجهل يابا  ...   اللى لحن ده النشيد
والجهل يابا  ...   اللى غنى ده النشيد

يا : بنات الحور
سيبو القمر يدور

يا : بنات الحور
سيبوا
القمر
يدور .


                                (ديسمبر 1983 )

الطير العازف على جناحه المكسور (نوفمبر 1983 )

magdie-2maktoobblog.com
ياهلترى الدمع ويالحزن راح يروى الغيطان ؟
ياهلترى .. سفر الكلام فوق الورق والميكروفون ..
يقدر يرد لطيرى غصنه دخ اللى راح ؟
ياهلترى .. تقدر ياطيرى المنطرد ..
أنك تغنى وأنت مكسور الجناح ؟

البرد نايم جوه ضلعاتك فى حين ..
وهبك زمانك للكفاح
واهلك على القهوه
بيلعبوا الطاوله
ويطلبوا المشاريب
وف حين ماتصرخ أنت
- ياغصنى الحبيب
بيقوموا همه ويصرفوا
- يازهر ليه ؟
- ادينى مره زى مطلب
ويكرروا الرميه
ويقولوا بنعافر

أما السؤال من فوق وشوشهم
كان يمر فى كل صبح وكل ليل
مر الكرام
مع أنه كان يرمى السلام
لكنه ماحدش بقى
بيرد ياطيرى السلام !

مسكين يامتحاصر
غربان عليك بتحوم
باعوا الولاد فى السوق
والنخاسين شرعهم
مين يدفع السعر المقرر .. يستلم
البومه قدرت ع التمن
بعتت غراب كان ابن عمك
- كان فى يوم -
قام وقتها بدور وسيط
والنخاسين .. باعوا الولاد
لجلن يكونوا ف يوم عبيد
فى الصك كان مكتوب ( يموت
مين يرفض أنه ينحنى لجلن يقدم
للعجوزه البومه كاس )

دمك ياطيرى كان منا البومه الوحيد
وتمز بيك ده اللى يرفض أنه يبقى م العبيد
ياه
البومه مزت بالكتير

لساكوا ع القهوه
لساكوا معتقدين فى عصر المعجزات
لساكوا بتدققوا فى الزهر حين يترمى
- دى سه  ويك
-لأ
أنا شفتها دوسه
(يالأهل ياحوسه )
لبست عينكو النضارات
أمتى بقى تلبس عقولكم ياقرايبى
النضارات .

                                               ( نوفمبر 1983 )

قصسدة كربلاء ( 1984 )

1-
مطفى على روس الحوارى فى الميداين والكفور
ياهلترى كنت الفانوس ؟
ريقك على ضهر التخلى والتناسخ انطلق
قاصد صاجاتك ياهرم
ياهلترى - من كام سنه-
منقوع فى ضحكات المفارش ع السرير..
والبنوك الأجنبيه والتحايل ع القلم ؟
ياهلترى جوه البطاقات اللى دونها التمدين .. صرت بانى كام هرم ؟

معصوره يابزاز الأراضى لجل باكوره خضار
وغموسه يالقم الحوارى فى الخطر
مرخيه ياستارة الغروب..
يشمك على وش الصبابا والديار
متخبى ياضحك العيون الطيبين ..
خلف الجفون المرتخيه والرموش اللى كحلها الرماد .

مرسوم أنا فى عنيكى موسم للحصاد
محفوره فوق وش الضلوع
نوبة عطش طالت .
النيل على رقباته ملفوف الجفاف
نخل العطاش منحنى ..
يشرب نهايته م المصارف والبرك

لونك على وش الحوارى طفح
لون الحوارى ع الوشوش بهتان
يامهره هل نفس الحصان..
فى أرضنا يرمح ؟
ياهلترى ..لساكى يالبلابه ناويه تسرحى
وتضللى بيتنا القديم ؟

2-
متبعترين ياطرح أشجار الحوارى
..ع الطريق رحله صفاء
فاردين قلوبكم للغريب ضله وبيت
مادين طبالى للضيوف
يكلو .. فى ديلكم يمسحو ظبط الأيدين

خافت من الخوف العيون
ضى القمر خافت
وبلت من القهر الأيدين
ضى القمر تغريب
كمشانه ياشمس الرجوع

3-
لسه ياخاله بتلمحى بكره
من فتحه المندل .. وفى قرايه الرمل ؟
يارمل ع المنديل
تقلت جفون الهم
ياحرف تشفى عيل
ياجرح يللا اتلم
يادم هل ممكن .. تعرف بقى صاحبك ؟
لجلن فى يوم ترتاح ..
وتسد باب الريح

خاتمه
لابس يريد وش الحسين
يامين يرجع للحسين وشه
يامين يولف للبيبان مفاتيح

                                           ( مجدى الجابرى 1984 )

حضن ( مهداه الى الصديق الشاعر \ أسامه شهاب ) أكتوبر 1983

حضن
عينيا عش طير سرك
وقلبى ع الوفا مفطوم
وحضنك بيتى ياصحبى
فى حين تغريبتى بين أهلى
وحين النوم ..
ينام طيفك فى جوف عينى
ينام طيفى فى جوف عينك
رموشك فرشتى وستى اللى تحكيلى ..
عن البادر بذور بكره فى أرض الغير
ولايحصدشى غير أحساسه بالراحه
عن الفاس اللى بيعافى فى أرض موات ..
وعن نجمايه سواحه ..
بتبدر ع الغلابه القوت .

ياصحبى ياسكن الهدمه اللى فوق جلدك
ياراكب عجله دواره كما الدنيا تدور ضدك
ياراسم كل أحلامك على ضلى
فى حين ماكنت لسايا بشخبط حلمى فوق ضلك
قسمنا البسمه ياصحبى على نفرين
قسمنا الدمعه ياصحبى على نفرين
فى حين ماكنت بتفرق نصيبك م الفرح ع الناس

أنا فرقت مانبنى من الدمعه
وقلتلهم ساعتها دى ( أشتراكية )
برغم انى اخدت نصيبى م البسمه لوحديا
لقيتك يومها ياصحبى بتروى بنص دمعيتك ..
غيطانى البور

ساعتها شفتنى صاحبك
لكنى شفتنى صغير
وشفتك قد ايه أكبر..
من القمرايه حين تطلع فى عز الليل ابو العتمه
وم الشموسه حين تطلع ترضع بالمان الكون ..
وبالحكمه .
ترضع نبته ياصحبى يدوب لساها بتنبت
وانا بتمنى ياصحبى ياراعى نبتتى الغضه
متبقاشى مجرد انها شجره
دانا بتمنى القاها فى جناينكم أمل طراح
ليقطف منها مين ياكل
ومين نفسه
يدوب يرتاح .

                                               ( أكتوبر 1983 )

أشعار مصرية ( التحاريق ) كتبت 1984

مقدمة
وبتعشقينى ياصبيه وبعشقك
لو يبدروا جوايا مهما يبدروا
بلقى غيطانى بتطرحك .

جبل المسا
الشمس لو تبكى على خد السما
حتمن يبوش وش القمر
رح ينحنى ضهر الوليد
يمشى مطاطى جوه غربال الأجل
مع أنه كان يحلم يطول شوشة الجبل
يحلم يفسر للعزيز حلمه العويص
يحلم يتعتع من على صدر الولاد ..
جبل المسا .

أغنيه خلفيه
الشمس تفاحه
والناس بتزرع سنط
ياسقيه رواحه
بليلى ريق الرض
ياآهه جراحه..
ومفرعه فى حلقى
يامهره رماحه
أرش السبق ملكى .

-2-
الصوت معشش فى الصدور
مات الحسين
هيه الطحالب عمرها تبقى شجر ؟
ياحضن بياع الأمان
ياسمكه بيضه فى المضيق
البيض مهما يفقس حيتان
....................
الريحه فجت م الزمن
عهد الربيع جوه الزهور صابه العفن
جن الجنين فضل يعشش جوه بيت الولد
خيم على عين النهار ..
ليل الرمد
واترش فوق وش الشجر عرق الخريف
آدم بيرمح فيكى يابلاد العرق ..
خلف الرغيف

أغنيه جانبيه
وبلحنا صيص ع الجريد عراجينه بتنطر دموع
ياقمح سنبل ف الوريد
ياقطن زهر ف الضلوع .

-3-
النيل فى ضل الأهرامات ..
ريح حموله وارتمى ..
رجع شريط الذكريات
( الفجر طالع يبتسم
فارد جناحاته على شوش الشجر
فارد جناحاته على شوش الجبال
ماد أيديه فوق الشفايف والبيوت
طاير حمام البرج فوق وش السما
القله ضاحكه جنب منديل الغدا
مبتسمه نخله عجوزه نايمه فى حضن الهرم )


أغنيه ختاميه
يابو السياييل      يابحر النيل
ده الحمل تقيل    وأنت الحمال
والشوق قوال    والنور وياك
فرعون بناك     ومشى وهلاك .


                                                    فبراير 1984