قصيدة أغسطس
حذار أن تذهب إلى البحر
وإذا ذهبت فأسلم له جسدك
“سعدى الشيرازى”
ع الصخره اللى هناك ف أغسطس
وشى المحفور
دمى الفوار
أطرافى بتسقط
والملح
ملامح بتغادر كفى / يمام
وتحل الريح من أسرى
تفر الغنوه / الكرباج
من شباك متوارب ع الشط المغروز ف اكتافى
أتوارب
جسمى مقفول على سرب يمام بيسبح للنور المطفى
ولع عود كبريت
حاسب
نفسك عرانى
ورمانى تحت الشلال
يا ستار
الشارع هايص
وكأن القلب نهار
أمال
لما ضمتنى
عشش على أول موجه يمام
النار
تحت مخدتى
ف لسانى
شبك دراعاتك بحر هناك
ع الصخره هدومى
بتهيج اتنين عشاق
بيقربو من بعض
بيتلامسو لأول مره
فرت زغروطه من شباك مقفول
حاسب
الموج غطاك
دمى
أطرافى بتسقط
وبيوت ع الشط هناك بتاكلها
الريح
النار
اكتافى سلخها الليل البحر تقيل
جميل
إنك حطيتى كل الأسرار فى خزاين
مفتاحها
النار
الملح
البنت بتلعن ف عطورى
وبتدخل شق ف بيت مهجور
البيت
الشارع
الناحيه التانيه
بص
طابور من رمل بيعلن
اسمع
ع الصخره اللى هناك ف أغسطس
النور المطفى بيجدل ف ضفايرك
لأ بيشق هدومى ويدخل بينى وبينك
كدابه
احنا اتنين مش واحد
لأ واحد
والدم دليل البحر الهايج
ملح بيشهق ع الصخره هناك
ويمام بيروح على قبة بطنى يسبح
اسبح
القلب / سلاح الكف المتاكل م الملح
الملح
صحيح
البنت بتخرج حبلى من الشق
والصخره / وشى المحفور / أطرافى
النور المطفى
يمام
بيكن ما بين الشطين
ويموت
ليست هناك تعليقات:
إرسال تعليق