قصيدة أوراق

أوراق

مجدى الجابرى

ورقة ( 1 ) 

آه .. يا خليفة رقصتى .. باش الوتر 

إن يوم نزلت البارد الواسع .. 

فقوللى 

جملك / بدن شفاف 

العضم فضة ودهب 

- ،، - 

.. مرحب .. 

كريم قاصد .......

خللى مداسك .. 

ده احنا يزيدنا الشرف ،

.. 

... قيدى القانون ....

واشوى لنا كوزين دره ، ...

مرحب 

الناس لبعضيها / بيوت 

والحدايات بيت الـ ....

- شايك .

مرحب 

ــــــــــــــــــ

شعر البنات خايف 

ل يقصقصه البرق المفاجئ 

- ما تلتجئش لصدر نضاح بالدبول 

على طرف منديل السما .. واقف .. 

نويت اقفز 

- كفى ماهيش سكة لقا 

الشمس بقعة دم من جرح اللامون 

( غيرت وضع الأرض داخل بصتى .. )

كان العرق / منديل فى إيد البنت فى الكوشة ،

الكرسى / توب واسع ،

الضحكة غزت ننى عينى .. لم بكيت 

- ،، -

شربات بيتوزع .. 

محمرة عينى من عفار الرقص 

............

............

ورقة لا مون مصفرة .. جوايا 

- ،، - 

( غيرت وضع الأرض داخل بصتى .. )

شعر البنات .. مفزوع ،

نايمة بيوت الحى فى عرض الطريق ،

كتاتيب / شون 

أشعار / قماش 

فنزفت شون حامى .. ما بيعرفش غير عاشق 

هل غيروا النومة ؟؟ 

.............

.............

ورقة لامون مصفرة .. جوايا .

( غيرت وضع الأرض داخل بصتى .. ) .. وبكيت 



* * *

ورقة ( 2 )

الليل / حصان الصبح 

شعر البنات / ديل الحصان .. يتمطوحه نفسى 

إمتى الصهيل يوصل .. 

شجر اللامون بوداعة التطره ؟؟

دفا الكفوف بالبدن ؟؟

- ،، - 

زهرت توب الليل .. 

( مالك حزين ) لافى بنفسجتى 

واتبادلوا ألوانى 

......................

شديت جريدة نخلة ، فاصلانا 

وواصلانا ،

بين قلبها ودقة كعوب فرسى .. / وتر هزاز 

- ،، -

مهمازى واخد بنفسجتى .. الغنا واللون ، 

وانا ما أخذتْ العهد إلا من يتيم ضعفان .. 

فباركنى يا جسدى 

لجل ابتدى نزف الملامح واللامون والشعر 

صندوق قديم .. فيه الكتاب والسيف ومية المحاباة 

طاير به جان احمر 

ملك ملوك الجان .. على كرسى م العضم الدهب 

مخاليق ، حيطان ، سجاجيد ، نقوش / ميه .

- ،، - 

اسمى ولونى ونخلتى / ( جبرى ) 

فما تغدروش ( مالك حزين ) لا غى بنفسجتى .

* * *

غنـا 

يا طلاع الجراح 

يا كف / شمس .. وشح 

هزهز بشويش القلب 

ناعس يمام الرب 

- ،، - 

فركيشة يا جروحى 

لا تنزفى روحى 

قلبى اتبدر / سمسم 

على نخل تنويحى 

يا نخل بالراحة 

زفزفت لى جروحى 

* * *

ورقة ( 3 ) 

افرض إن الوداعة طليقة البحر اتاوبت لما كسر نجم 

غريب .. إنتاية نخلة 

طليقة الشعر كسيرة القلب ،

وافرض إن الوتر البايش حب يشارك جسمى رقصة 

نار الخلق المره .. 

وفرك قلبه / سمسم أو براغيت ؛

وافرض إن ايزيس اكتشفت سرى .. ورفضت تكشف 

عنها البرقع .. رفضت 

تقرا كتاب النيل المتجمد ضله ف عين الودعة طليقة البحر ؛

..........................

هل يقدر جبل المرسى يمد دراعته .. ويحمل عنى 

هذا الخلق ؟؟



ورقة ( 4 ) 

................................

................................

.................. وبينطلق :

شعر صدره .

طالق عيونه ، :

لحيته ،

نخلة غناه ،

فاتح مسام الجلد .. للعرق الحريمى ،

للجبل ،

للبحر ... ؛

رامح ورا محرات سحاب 

رجليه ف طمى العشق شققها الحفا

بوشان جبينه / صفحة مبتورة الكلام 

- ؛؛ - 

- لا دا صفار الغيرة ولا كركم عيا ،

لا دا خضار العين ولا عض البرك .. 

ارم هذا الجلد ، والحم ضفتين البحر 

ارعد بروح شيطان تقى 

واكتب كتاب سرب الفراشات ع الجبل 

هل يوم رأيت نفسك ف غربال البكا ؟ 

وهل انفردت وحد شوك الحلم غزك فانكمشت ؟

- لأه 

كشف لى ما تحت انطلاقك .. وافترش ملاياتى .. 

يمكن 

أنسحب .. من تحت رجلين الفصول القحط .. وافرد 

خطوتى .. 

وأجيك 

- أرابيسك / وش الحلم .. 

دبابيس حديد / هذى الرموش 

وعيون / نحاس مصهور حديثاً .. 

فانتفض .. غمض عينيك .. 

انزل ف هذا البحر 

بوش 

بوش 

بوش 

بُشت ؟!!